Davletov Ruslanbek Quroltayevich
Direktor
1980-yil Xorazm viloyatida tugʻilgan. Oliy maʼlumotli huquqshunos va iqtisodchi boʻlib, 2001-yilda Buyuk Britaniyaning Varvik universitetini, 2003-yilda Jahon iqtisodiyoti va diplomatiya universiteti magistraturasini, 2007-yilda Toshkent davlat iqtisodiyot universitetini hamda 2010-yilda Oʻzbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.
Mehnat faoliyati davomida Monopoliyadan chiqarish va raqobatni rivojlantirish davlat qoʻmitasi hamda Vazirlar Mahkamasining Axborot-tahlil departamenti, Huquqiy ekspertiza va xalqaro shartnomalar boshqarmasida yetakchi mutaxassis, bosh mutaxassis lavozimlarida ishlagan.
Keyinchalik Oliy sud huzuridagi Sud qonunchiligini demokratlashtirish va liberallashtirish hamda sud tizimi mustaqilligini taʼminlash boʻyicha Tadqiqot markazida rahbar va Oʻzbekiston Respublikasi Prezidenti devonida shoʻba mudiri vazifalarida faoliyat yuritgan.
Oʻz mehnat yoʻlini davlat boshqaruvi tizimida davom ettirib, xususan, Oʻzbekiston Respublikasi Adliya vazirining birinchi oʻrinbosari, Prezidentning murojaatlar bilan ishlashni nazorat qilish va muvofiqlashtirish boʻyicha Davlat maslahatchisining birinchi oʻrinbosari hamda Oʻzbekiston Respublikasi Adliya vaziri lavozimlarida mehnat qilgan. Shuningdek, Oʻzbekiston Respublikasi Prezidentining vakillik organlari, nodavlat notijorat tashkilotlar, din va yoshlar masalalari boʻyicha maslahatchisi sifatida ham faoliyat koʻrsatgan.
1-darajali adliya maslahatchisi maxsus unvoniga ega. 2021-yilda “Doʻstlik” ordeni bilan taqdirlangan.
Ergashev Vosidjon Yokubovich
Direktor o‘rinbosari
1978-yilda Samarqand viloyatida tug‘ilgan. 1999-yilda Samarqand davlat universitetini huquqshunoslik mutaxassisligi bo‘yicha tamomlagan, yuridik fanlari nomzodi, professor. U mehnat faoliyatini Fanlar akademiyasining Falsafa va huquq institutida boshlab, uzoq yillar davomida Toshkent davlat yuridik universitetida o‘qituvchi, dotsent, kafedra mudiri, magistratura bo‘limi boshlig‘i va prorektor lavozimlarida samarali faoliyat olib borgan.
Olimning ilmiy qiziqishlari fuqarolik, xalqaro xususiy, tadbirkorlik va konstitutsiyaviy huquq yo‘nalishlarini qamrab olib, u mazkur sohalardagi dolzarb masalalarga bag‘ishlangan 100 ga yaqin ilmiy maqolalar, 10 ga yaqin monografiya, darslik va o‘quv qo‘llanmalari muallifi hisoblanadi.
Oliy ta’lim va davlat boshqaruvi tizimida katta tajribaga ega bo‘lgan V.Ergashev o‘z faoliyati davomida Toshkent yuridik kolleji direktori, shuningdek, Davlat bojxona qo‘mitasining Bojxona instituti boshlig‘i lavozimlarida xizmat qilgan.
2-darajali adliya maslahatchisi maxsus unvoniga ega bo‘lgan olim ko‘p yillik samarali mehnatlari uchun 2022-yilda «Sodiq xizmatlari uchun» medali bilan taqdirlangan. U 2023-yilning 20-yanvaridan boshlab O‘zbekiston Respublikasi Prezidenti huzuridagi Qonunchilik va huquqiy siyosat instituti direktorining o‘rinbosari lavozimida faoliyat ko‘rsatmoqda.
Rasulev Abdulaziz Karimovich
Ilmiy kotib
Yuridik fanlari doktori, professor
200 dan ortiq ilmiy nashrlar, jumladan, jinoyat huquqi, axborot xavfsizligi, kiberjinoyatchilikka qarshi kurashish, kriminologiya, internet tarmog‘ida jinoyat va huquqbuzarliklarning oldini olish va profilaktikasi bo‘yicha monografiyalar, darsliklar va o‘quv qo‘llanmalar muallifi.
2006-yilda nomzodlik, 2018-yilda axborot texnologiyalari va xavfsizligi sohasidagi jinoyatlar mavzusida doktorlik dissertatsiyalarini himoya qilgan.
A.Rasulev dissertatsiyalari natijalari O‘zbekiston Respublikasining Jinoyat va Jinoyat-protsessual kodeksida, O‘zbekiston Respublikasining “Axborotlashtirish to‘g‘risida”, “Elektron tijorat to‘g‘risida”, “Bolalarni ularning sog‘lig‘iga zarar yetkazuvchi axborotdan himoya qilish to‘g‘risida”gi qonunlarida o‘z aksini topgan bo‘lib, huquqni muhofaza qilish organlarining huquqni qo‘llash amaliyotiga joriy etilgan.